Leiðist ekkert að leiðast
Sigurborg Magnúsdóttir, kennari í Heiðarskóla, hefur notið samveru stórfjölskyldunnar og er nýbúin að kaupa miða á Þjóðhátíð fyrir hana. Víkurfréttir lögðu nokkrar laufléttar spurningar fyrir Sigurborgu.
– Hvernig hefur þú verið að verja páskunum?
Ég er svo heppin að mér leiðist ekkert að leiðast, mér finnst auðvelt að hlýða Víði. Við stórfjölskyldan höfum notið þess að vera heima í páskafríinu. Við höfum stundað Metabolic-æfingar og nýtt okkur vel æfingar frá Helga. Við höfum spilað, legið í sófanum og horft á sjónvarp, dansað við Helga Björns, farið í göngutúra og ýmislegt fleira. Ég byrjaði líka á bókinni hans Andra „Um tímann og vatnið“ og hlakka til að halda áfram með hana. Það allra besta við páskafríið 2020 er klárlega samveran heima með Gunna og börnunum okkar.
– Hvernig páskaegg fékkstu og hver var málshátturinn?
Klassískt Nóa & Sirius nr. 4. „Betri er beiskur sannleiki en blíðmál lygi.“
– Hvaða aðferðir ertu að nýta til að eiga í samskiptum við fólk?
Aðallega símtöl og Zoom.
– Ef þú fengir bara að hringja eitt símtal í dag, hver fengi það símtal og hvers vegna?
Hópsímtal á systkini mín því mér þykir svo óendanlega vænt um þau.
– Hvernig ertu að upplifa nýjustu tíðindi um að það muni jafnvel margar vikur inn í sumarið að aflétta hömlum vegna COVID-19?
Eins og málshátturinn minn segir þá er betra að fá að heyra þetta strax og undirbúa sig. Er samt nýbúin að kaupa miða á þjóðhátíð í Eyjum fyrir alla fjölskylduna.
– Hvaða lærdóm getum við dregið af heimsfaraldrinum?
Hraðinn og spennan í tilverunni þarf að minnka og í stað þess að þjóta út um allt getum við unnið meira og betur saman. Ég vona að manneskjan átti sig á að við verðum að slaka á í græðgi því ég trúi því að hún sé mögulega rótin að þessu. Munum svo að lífið er alltaf akkúrat núna, dagurinn í dag kemur ekki aftur svo njótum hans eins vel og við getum.
– Ertu liðtæk í eldhúsinu?
Já, við Gunni höfum bæði mjög gaman af því að elda sem er mjög hentugt á stóru heimili.
– Hvað finnst þér virkilega gott að borða?
Nautasteik með góðu meðlæti.
– Hvað var í páskamatinn?
Lambahryggur með steiktum gulrótum, aspas og sveppum. Litlar pavlovur með skyrfyllingu í eftirrétt.
– Hvað finnst þér skemmtilegast að elda?
Fastur liður á föstudögum eru heimagerðar pizzur. Ég geri botnana og svo gerir hver og einn sína pizzu og skellir í pizzaofninn góða. Þetta er skemmtileg hefð, bestu pizzur í heimi og frábær samvera.
– Hvað var bakað síðast á þínu heimili?
Möndlukaka sem sló rækilega í gegn!
– Ef þú fengir 2000 krónur. Hvað myndir þú kaupa í matinn?
Ekki auðvelt fyrir átta manna fjölskyldu en mögulegt að redda þessu með því að kaupa í uppáhaldspastarétt fjölskyldunnar, Pasta Arrabiata, sem er mjög góður og fljótlegur réttur.
– Hvað hefur gott gerst í vikunni?
Við höfum fengið að finna fyrir vorinu og vaknað við fuglasöng.
– Hvað hefur vont gerst í vikunni?
Án nokkurs vafa er það fráfall Ingu systur minnar.
Hvaða spurningu hefðir þú viljað fá að svara í þessu viðtali? Hver er spurningin og svarið við henni?
– Áttu rafmagnsbíl?
En gaman að þú skildir spyrja að þessu því við erum einmitt nýbúin að kaupa okkur rafmagnsbíl! Það er æðisleg tifinning að fara út að aka á honum.
