Bláa Lónið - 01apíl.
Bláa Lónið - 01apíl.

Mannlíf

Kvennakór Suðurnesja fagnar 50 ára afmæli
Fimmtudagur 8. febrúar 2018 kl. 07:00

Kvennakór Suðurnesja fagnar 50 ára afmæli

Þann 22. febrúar 2018 verða 50 ár liðin frá því að Kvennakór Suðurnesja var stofnaður og er hann elsti starfandi kvennakór landsins. Kórinn hefur átt sinn þátt í blómlegu menningarlífi á Suðurnesjum og hefur stuðlað að þátttöku kvenna í tónlistarlífi á svæðinu, en mikill fjöldi söngkvenna hefur sungið með kórnum þessi 50 ár.

Kórinn ætlar að halda veglega upp á stórafmælið með afmælistónleikum í Stapa, Hljómahöll á sjálfan afmælisdaginn, auk þess sem haldin verður sýning í tengslum við afmælið í samstarfi við Byggðasafn Reykjanesbæjar í Stofunni í Duus Safnahúsum. Einnig munu Víkurfréttir gefa út sérblað í tilefni afmælisins sem gefið verður út miðvikudaginn 14. febrúar og dreift í öll hús á Suðurnesjum, þar sem farið verður yfir sögu og starfsemi kórsins í máli og myndum.

Public deli
Public deli

Á tónleikunum í Stapa verður flutt tónlist eftir Suðurnesjatónskáld og textahöfunda, má þar nefna Magnús Þór Sigmundsson, Of Monsters and Men, Gunnar Þórðarson, Valdimar, Rúnar Júlíusson, Hjálma, Þorstein Eggertsson, Magnús Kjartansson og fleiri.

Kórinn fær til liðs við sig frábært tónlistarfólk af Suðurnesjum, en þau Valdimar Guðmundsson úr hljómsveitinni Valdimar og Fríða Dís úr Klassart koma fram á tónleikunum og um hljóðfæraleik sjá Geirþrúður Fanney Bogadóttir á píanó, Þorvaldur Halldórsson á trommur, Jón Árni Benediktsson á bassa, Ásgeir Aðalsteinsson á gítar og Valdimar Guðmundsson á básúnu. Stjórnandi kórsins er Dagný Þórunn Jónsdóttir.

Sýningin í Duus mun spanna 50 ára sögu kórsins í máli, myndum og hljóðdæmum. Sýningin verður opnuð föstudaginn 9. febrúar og mun kórinn syngja við opnunina kl. 18. Einnig heldur kórinn tónleika í Bíósalnum í Duus við lok sýningarinnar sunnudaginn 11. mars, en þá helgi er safnahelgi á Suðurnesjum. Safnið er opið alla daga frá kl. 12 - 17.

Kórkonur eru stoltar af því að konum hér á Suðurnesjum hafi tekist að halda starfseminni svo blómlegri allan þennan tíma. Þar eiga stofnendur kórsins mikinn þátt því vel var staðið að uppbyggingu fyrstu árin þrátt fyrir erfiðar aðstæður fyrir konur á þeim tíma að stunda og reka félagsstarfssemi. Fjölmargar konur af Suðurnesjum hafa átt þátt í að syngja með kórnum og halda honum gangandi. Þessari starfssemi sem er hluti af okkar menningarlífi og sögu kvenna á Suðurnesjum verður gerð skil á sýningunni. Margir ættu þar að kannast við ömmu, mömmu, systur eða vinkonu í sögu kórsins.