Kvennahlaupið í fyrramálið

Kvennahlaup ÍSÍ mun fara fram í 17. sinn á morgun.

Hlaupið verður í öllum bæjarfélögum á Suðurnesjum, en þátttökugjald er 1000 krónur og fá allir þátttakendur bol og verðlaunapening.

Í Vogum er hlaupið frá Íþróttamiðstöðinni sem og í Garði og Sandgerði, en í Reykjanesbæ er hlaupið frá Holtaskóla og í Grindavík er hlaupið frá Sundlauginni. Á öllum stöðum hefst hlaupið kl. 11.

Sjóvá Kvennahlaup ÍSÍ mun fara fram á yfir 100 stöðum hérlendis og erlendis en árlega taka um 18.000 konur á öllum aldri þátt. Meginmarkmið hlaupsins er að hvetja og styðja konur á öllum aldri til aukinnar hreyfingar og heilsueflingar. Konur eru hvattar til að vera á iði ekki aðeins þennan eina dag heldur sem flesta aðra daga ársins. Allar konur geta tekið þátt í kvennahlaupinu á sínum forsendum, óháð aldri og líkamlegri getu.

Í ár er yfirskrift Sjóvá Kvennahlaups ÍSÍ: „Hvert skref skiptir máli. ÍSÍ og UNIFEM á Íslandi hafa skrifað undir samstarfssamning með það að markmiði að vekja athygli á starfi UNIFEM í þágu kvenna, sérstaklega í Afganistan, og hvetja íslenskar konur til að sýna samstöðu með mannréttindum kvenna um leið og þær efla eigin heilsu. 50 kr. af hverjum seldum bol mun renna til UNIFEM.