Krúttsprengjur fengu heimili

Kettlingarnir Sandra og Rúnar, sem knattspyrnudómarinn og veitingamaðurinn Magnús Þórisson fann við Helguvíkurveg um nýliðna helgi, eru komnir með ný heimili.

Eftir að Magnús greindi frá kettlingunum á fésbókarsíðu sinni og Víkurfréttir sögðu frá þessum litlu krúttsprengjum, þá fór boltinn að rúlla. Á þriðja þúsund manns deildu myndinni og fréttinni um kettlingana tvo sem varð svo til þess að þeir fengu báðir nýtt heimili.

„Það var ungt par sem kom í gær og tók Söndru að sér en þau höfðu nýlega misst gömlu kisuna sína, það er óhætt að segja að það varð ást við fyrstu sýn hjá þeim. Rúnar fór núna rétt áðan en hann fékk fallegt heimili hjá fjölskyldu í Reykjavík, sem var að leita að kettlingi,“ segir Magnús á síðunni sinni.

Sandra og Rúnar.