Knúsuðu Valgeir Guðjónsson á söngfundi

Börn og starfsfólk á leikskólanum Gimli í Reykjanesbæ héldu Græna daga í síðustu viku. Þar kenndi ýmissa grasa og voru uppákomur margvíslegar, svo sem heimsókn frá Önnu grænu, sýning barnanna í skólanum í tengslum við Listahátíð barna og tónlistarmaðurinn Valgeir Guðjónsson heimsótti þau á söngfundi. Hann flutti lög af nýútkomnum geisladiski sem ber nafnið Fuglakantata, sem hann gaf út í samstarfi við Hjallastefnuna. Lögin eru eftir Valgeir en textar eftir Jóhannes úr Kötlum. Ljóðin eru öll um fugla nema eitt sem fjallar um hagamús.

Í daglegu starfi í leikskólanum Gimli er unnið að umhverfismálum. Allt sorp sem til fellur í skólanum er flokkað og hugað er að umhverfinu með nýtni og nægjusemi. Þá eru börnin eru meðvituð um að vel skuli ganga um náttúruna og hvernig beri að njóta hennar.                                                      

Í samstarfi við Njarðvíkurskóla var Barnalundur tekinn í fóstur og hugað vel að svæðinu þar. Grænir dagar hafa verið haldnir á Gimli síðan skólinn varð Skóli á grænni grein árið 2010. Dagarnir hafa verið nýttir til þess að setja upp ýmsar umhverfisvinnustöðvar, kynna sér umhverfismarkmið og bregða á leik. Þá hefur leikskólinn flaggað Grænfánanum tvisvar sinnum.

Meðfylgjandi myndir voru teknar við ofangreind tilefni.