Kennir foreldrum að láta drauma rætast

Rithöfundurinn Þorgrímur Þráinsson heldur á nk. þriðjudag, 11. febrúar, fyrirlesturinn „Láttu drauminn rætast“ fyrir foreldra nemenda í 8.-10. bekk í grunnskólum Reykjanesbæjar. Fyrirlesturinn verður í Fjölbrautaskóla Suðurnesja og hefst klukkan 20:00 og er á vegum FFGÍR (Foreldrafélaga grunnskólanna í Reykjanesbæ).

Þorgrímur hittir einnig nemendur í 10. bekk dagana 7.-14. febrúar í sínum heimaskólum. Honum hefur verið tekið fagnandi af nemendum og gefur foreldrum nú tækifæri til að heyra hvað hann hefur fram að færa.

„Fyrirlesturinn er fyrst og fremst hvatning til nemenda um að bera ábyrgð á eigin lífi og hafa hugrekki til að fylgja hjartanu. Ég segi sögur því til stuðnings,“ segir Þorgrímur. Foreldrar eru hvattir til að taka vel á móti Þorgrími og fylla salinn. Lofað er ánægjulegri kvöldstund.