Kammersveit Reykjavíkur leikur í Duus

Kammersveit Reykjavíkur heldur tónleika í Duushúsum í Reykjanesbæ miðvikudagskvöldið 6. apríl nk. Þeir hefjast kl. 20.

Sveitin mun flytja strengjakvintett Schuberts í C-dúr op. 163, sem er oft nefndur drottning kammerverkanna vegna þess hve fallegur hann er. Þegar Kammersveitin lék hann á tónleikum sínum í Reykjavík sl. haust var fjallað um flutninginn í dagblöðum á eftirfarandi hátt:

Í DV, S.Þ.G.:
"Flutningur verksins var hreint út sagt frábær.....Hægi kaflinn hefði e.t.v. mátt vera aðeins hægari en var samt átakanlega vel leikinn og síðustu tvo kaflana með sinni manísku lífshyllingu, spennu og óvissu er vart hægt að spila betur".

Og í Morgunblaðinu R.Ö.P.:
"Skemmst er frá því að segja að leikur fimmmenninganna úr Kammersveitinni var sópandi glæsilegur, innlifaður fram í fingurgóma og í beinu rótarsambandi við alþýðlegan undirtóninn sem gerir kvintettinn að einu hjartnæmasta strengjaverki 19. aldar".

Kammersveitina skipa á þessum tónleikum:
Rut Ingólfsdóttir, fiðla
Sigurlaug Eðvaldsdóttir, fiðla
Þórunn Ósk Marinósdóttir, víóla
Sigurður Bjarki Gunnarsson, selló
Hrafnkell Orri Egilsson, selló

Tónleikarnir taka eina klukkustund.
Miðasala við innganginn. Miðaverð er 1000 kr en eldri borgarar og nemendur við Tónlistarskóla Reykjanesbæjar fá frítt inn.