Kaldaljós í Keflavík á fimmtudaginn

Kvikmyndin KALDALJÓS hefur fengið rífandi aðsókn síðan hún var frumsýnd 1. janúar. Í gærdag, þegar myndin hefur verið í sýningu í 4 daga hafa alls 6636 manns séð myndina. KALDALJÓS verður tekin til sýninga í Nýja bíói í Keflavík á fimmtudaginn.

Aðeins einu sinni áður hefur íslensk kvikmynd fengið meiri aðsókn fyrstu sýningarhelgi þegar um 8000 þúsund manns sáu HAFIÐ í september í fyrra. Um 56 þúsund höfðu séð hana sýningum lauk og má búast við svipuðu gengi fyrir KALDALJÓS næstu mánuði.

KALDALJÓS hefur ennfremur verið valin sem opnunarmynd Kvikmyndahátíðar Gautaborgar sem fer fram 23jan-2feb. Gautaborg er langvirtasta hátíð Norðurlanda og ein mikilvægasta kvikmyndahátíð Evrópu. Á hverju ári koma yfir 500 kvikmyndir til greina hvaðanæva að úr heiminum þar sem opnunarmyndin er í raun flaggskip hátíðarinnar telst þetta mikill heiður fyrir KALDALJÓS og góðs viti hvað varðar útrás myndarinnar á erlendar markað. Íslensk kvikmynd hefur aldrei áður verið valin sem opnunarmyndin á Gautaborg. Opnun hátíðarinnar og sýning myndarinnar fer fram 22. janúar í Gautaborg.

Að lokum má geta þessa að myndin hefur fengið afbragðs dóma hjá íslenskum gagnrýnendum og fjölmiðlamönnum. ***1/2 stjarna á Morgunblaðinu og Fréttablaðið skrifar:

"Kaldaljós er ákaflega áferðarfögur og vönduð mynd sem hreyfir við áhorfandanum og skilur eitthvað eftir sig, en slíkt er að verða æ sjaldgæfara þegar kvikmyndir eru annars vegar...Einn helsti styrkur myndarinnar liggur þó fyrst og fremst í góðum leik þar sem valinn maður er í hverju rúmi. Ingvar fer létt með að koma Grími á fullorðinsárum til skila og Kristbjörg Kjeld er frábær að vanda en að þeim og öllum öðrum ólöstuðum bera Áslákur og Snæfríður Ingvarsbörn myndina uppi. Samleikur systkinanna er með ólíkindum afslappaður og eðlilegur og þrátt fyrir ungan aldur tekst þeim að skapa persónur sem ekki er annað hægt en að heillast af og finna til með. Hér leikur allt í höndunum á Hilmari, börn, fullorðnir, tónlist og myndmál, sem skilar sér í fallegri, fagmannlegri, látlausri, sorglegri en fantavel leikinni eðalmynd."