Jólagjafahandverksmarkaður í Svarta Pakkhúsinu

Jólagjafahandverksmarkaður verður haldinn í Svarta Pakkhúsinu í Reykjanesbæ laugardaginn 6. nóvember milli klukkan 13 - 17.

Eftir frábærar viðtökur á jólagjafamarkaði okkar fyrir síðustu jól höfum við ákveðið að halda aftur markað en nú með nýju sniði.

Í fremri sal höfum við fengið til liðs við okkur kunna listamenn af Suðurnesjunum. Þar má nefna Hafdísi Hill leirlistarkonu, Margréti Ósk gullsmið, Ástu Karítas með skessupeysur, Ásthildi grasalæknir, Ágúst með hnýttar flugur og fleiri og fleiri.
Allir listamenn í fremri sal verða sjálfir til staðar að kynna sýnar vörur.

Í okkar sívinsæla innri sal þar sem 28 félagsmenn selja handverk sitt verður að venju frábært úrval af handunnum gjafavörum á góðu verði og í tilefni dagsins verðum við með 10% afslátt.

Þetta er kjörið tækifæri fyrir alla að koma að skoða fjölbreytt íslenskt handverk og versla jólagjafir.

Þess má geta að þeir sem versla við okkur í nóvember bíðst að skrá sig í lukkupott Svarta Pakkhússins þar sem þrír heppnir vinningshafar verða dregnir út 4. desember.

Heitt verður á könnunni og piparkökur í boði hússins.

Við hlökkum til að sjá sem flesta líta við og njóta jólastemningarinnar með okkur.