Íþróttaskóli í Vogum

Svanhildur Kristjónsdóttir, íþróttafræðingur hefur undanfarnar vikur verið með Íþróttaskóla í Vogum. Blaðamaður VF leit við í síðasta tímanum og spjallaði við Svanhildi.
„Íþróttaskólinn byrjaði í febrúar og er þetta tólfti tíminn hjá okkur“, sagði Svanhildur. Skólinn er ætlaður börnum á aldrinum 3-5 ára. Börnin fá þjálfun í jafnvægi og þrekþjálfun en meginmarkmiðið er að þróa hreyfiþroska barnanna. Svanhildur tók þátt í uppbyggingu Íþróttaskóla KR sem var fyrsti íþróttaskólinn fyrir börn. Áhugin fyrir skólanum hefur verið mikill hér á Suðurnejum en 12-15 börn hafa verið í hverjum tíma á laugardögum. Svanhildur segir að sé áhugi fyrir hendi gæti vel verið að hún byði upp á námskeið næsta vetur. Íþróttafélagið Þróttur í Vogum lánaði húsnæði undir námskeiðið og hefur tekið þátt í starfsemi skólans. Svanhildur er einnig með frjáls íþróttanámskeið fyrir börn á aldrinum 6-8 ára og 9-12 ára.