Hvað minnir þig á jólin? Þrettán lesendur svara

Hvað minnir fólk á jólin. Víkurfréttir leituðu til þrettán (jólasveina) lesenda og lögðu þessa spurningu fyrir þeirra.

Veiga Sigurðardóttir:

„Fallegu jólaljósin sem koma og skína í hverri götu.“

Hlíf Káradóttir:

„Smörlíkisauglýsingin sem við sungum með Ríó tríó, æði. Það sem var gaman að leika jólasveininn og fara með jólakort a milli húsa. Eplalyktin dásamlega, appelsín og malt. Og stóra jólatréð, síðasta tréð í Nonna og Bubba, ég dróg það heim, auðvitað snjór. Tréð náði upp í loft, ég var nýflutt, vantaði jólaskraut, svo ég setti tréð út i horn og skreytti það bara að framan, maður bjargar sér sko.“

Ómar og Magga:

„Lyktin af nýjum eplum sem komu á þessum árstíma frá Bandaríkjunum.“

Hildur Sigfúsdóttir:

„Laufabrauðsgerð og börn að væla yfir aðgerðaleysi foreldra í skreytingum.“

Tómas J. Knútsson:

„Ég gleymi ekki eplalyktinni úr gámunum sem við fluttum með Jökulfellinu rétt fyrir jólin, alveg yndislegt alla leiðina yfir hafið.“

Jóna Fanney Holm:

„Sjónvarpsauglýsingar eru miklar þessa dagana, meðal annars eru bækur auglýstar.“

Helga Ragnarsdóttir:

„Lyktin af heimagerða rauðkálinu.“

Heba Ingvarsdóttir:

„Eplailmurinn í kaldri geymslunni en mamma geymdi alltaf jólaeplin þar og smákökurnar sem hún hafði bakað. Þar voru einnig tveir trékassar með malt og appelsín í glerflöskum. Ilmurinn var dásamlegur í geymslunni.“

Hjördís Árnadóttir:

„Hvernig við leitum leiða til að lýsa upp svartasta skammdegið og efla nánd fjölskyldunnar.“

Kristjana Jóhannesdóttir:

„Heitt súkkulaði með rjóma, eplalyktin og aðfangadagskvöld með öllu mínu fólki sem barn hjá ömmu og afa heima á Ísafirði, yndislegt að rifja upp dásamlegar minningar.“