Hvað á ég að gefa litla barninu mínu að borða ?
Ókeypis fyrirlestur.Þriðjudaginn 6. nóvember klukkan 20.00 verður Ebba Guðný með fyrirlestur í boði Íþróttaakademíunnar um hvað eigi að gefa litlum börnum að borða.
Fjallað verður um hvers vegna það skiptir máli að gefa börnum frá fyrstu tíð hreinan og óunninn mat, hvaða matur það er og hvernig á að útbúa slíkan mat, sem er mjög einfalt að sögn Ebbu Guðnýjar. Hún mun þannig fara yfir undirstöðuatriði í því hvað á að gefa börnum að borða fyrsta árið og hvernig má halda áfram að venja þau á næringarríkan, lifandi og hollan mat sem nærir þau og kætir andlega og líkamlega. Tekin verða dæmi um fæðutegundir og meðhöndlun hráefnisins og Ebba kemur með alls kyns góðgæti og sýnir gestum. Með fyrirlestrinum fylgja nokkrar góðar uppskriftir að barnamat en líka uppskriftir fyrir alla fjölskylduna.
Hægt verður að kaupa stærra uppskriftarhefti á fyrirlestrinum á 500 krónur.
Tekið er á móti skráningum í síma 420-5500 og á [email protected]
Um Ebbu Guðnýju:
,,Ég var einfaldlega búin að vera lasin í maga með brjóstsviða og óþægindi í nokkur ár sem og síendurteknar kinnholusýkingar þegar ég breytti um mataræði”, segir Ebba Guðný. ,,Það er skemmst frá því að segja að ég varð fljótt á nýju mataræði algjörlega laus við öll þessi óþægindi. Þannig að þegar ég átti stelpuna mína langaði mig til að ala hana upp frá byrjun á næringarríkum og lifandi mat þannig að hún gæti verið hraust, glöð og heilbrigð og myndi aldrei þurfa að "skipta um mataræði." Ég las ógrynnin öll af bókum frá Bandaríkjunum og Bretlandi og viðaði að mér upplýsingum um barnamat og næringu því þetta varð fljótt mikið áhugamál. Ég var svo heppin að hafa þessa innri trú á því að næringarríkur og lifandi matur skipti miklu máli fyrir líðan og almenn lífsgæði manneskju. Ég sótti einnig fyrirlestra sem ég komst í og námskeið um grænmetismat og ég á mörgum margt að þakka sem hafa kennt mér eitt og annað.
Þegar dóttir mín var svo 7-8 mánaða byrjaði ég að skrifa hjá mér uppskriftir og fróðleik tengdan barnamat því ég hugsaði með mér að þetta gæti nýst fleirum. Smám saman bættist við og í dag er ég komin með heila bók sem hefur að geyma uppskriftir, aðferðir og almennan fróðleik í sambandi við næringu almennt sem og barnamat. Mjög ítarleg bók í rauninni sem er væntanleg í nóvember.
