Hugin heilsast vel eftir lifrarskipti

Huginn Heiðar Guðmundsson, 6 mánaða gamall drengur frá Reykjanesbæ, gekkst í nótt undir lifrarskiptiaðgerð á barnasjúkrahúsi í Pittsburgh í Bandaríkjunum.

Aðgerðin gekk vel en hann hefur frá fæðingu verið mikið veikur sökum sjúkdóms sem nefnist risafrumulifrarbólga, eins og fram hefur komið í Víkurfréttum. Ekki fannst hentug gjafalifur því varð að græða í drenginn hluta af lifur móður hans, Fjólu Ævarsdóttur.

Hugin og Fjólu líður vel þrátt fyrir erfiðleikana sem eru að baki og segir á heimasíðu Hugins á Barnalandi að hann hafi strax tekið miklum framförum. Gulan sem hann hefur glímt við frá fæðingu er í rénun og allt lítur vel út, n honum er haldið sofandi fyrst um sinn.

Aðgerðirnar voru mjög flóknar og tímafrekar en nú er vonandi að eftirleikurinn gangi eins vel og drengurinn litli nái sem fyrst fullum bata.

Þess má geta að stuðningsmenn Fjólu og Guðmundar hafa stofnað styrktarreikning í nafni Hugins þar sem þeir sem vilja styrkja þau í baráttunni geta lagt sitt af mörkum. Númer reikningsins er: 1109-05-449090, kt: 181104-3090.