Hjaltalín fær 93 Búnaðarbankamilljónir
Hjaltalín, sem er skipuð þeim Rebekku Björnsdóttur og Guðmundi Óskari Guðmundssyni úr Keflavík, hefur lokið við að gera myndband við lagið Myself, en lagið má finna á nýjustu breiðskífu hljómsveitarinnar, Enter 4.
Sveitin hefur jafnframt þegið tilboð gif-síðunnar vinsælu BerglindFestival.net á frumsýningarrétti myndbandsins og verður myndbandið frumsýnt á síðunni, við hátíðlega athöfn, á morgun, miðvikudag. Alls mun Berglind Festival greiða sveitinni og leikstjóra myndbandsins 93 milljónir króna. Gengið var frá greiðslunni á happy hour á Hótel Holti á föstudaginn, síðastliðinn, eins og meðfylgjandi mynd sýnir.
Ástæðan fyrir þessari háu greiðslu er sú að Berglind Festival fékk auglýsingatekjur á síðunni sinni um daginn og vildi eyða þeim í málsstað sem hún hafði „trú á“, eins og Berglind Pétursdóttir, eigandi og ritstjóri Berglind Festival, komst að orði.
Er hér um að ræða stærstu einstöku greiðslu sem greidd hefur verið fyrir myndband af einkaaðila á Íslandi. Þetta er jafnframt í fyrsta sinn í heiminum, svo vitað sé, að gif-bloggsíða frumsýni tónlistarmyndband.
Myndbandið er leikstýrt af Magnúsi Leifssyni, en hann hefur áður leikstýrt Glow með Retro Stefson, DeLorean með FM Belfast og Sykur með Gísla Pálma. Honum til halds og traust við gerð myndbandsins voru klipparinn Sigurður Eyþórsson, tökumaðurinn Árni Filippusson, aðstoðartökumaðurinn Þór Elíasson og Henrik Linnet sem sér um sjónrænar brellur. Steinþór Helgi Arnsteinsson sá um framleiðslu. Með aðalhlutverk fara hinir ungu og föngulegu Ólafur Ásgeirsson og Leroy Ciaprianne.
Frumsýningu myndbandsins verður fagnað ærlega á Kex Hostel í kvöld, þriðjudagskvöld. Hefst fögnuðurinn kl. 21 og verða ljúfar veigar í boði við upphaf kvöldsins.
