„Hey, þú! Hvað ertu að gera?“

Þær voru reffilegar ofurhetjurnar í Sandgerði í morgun þegar ljósmyndara Víkurfrétta bar að garði þar sem þeir voru að leik. Þegar ljósmyndarinn nálgaðist öskruðu þeir: „Hey, þú! Hvað ertu að gera.“
Ljósmyndarinn svaraði: „Nú ég ætlaði að mynda ykkur.“
Ofurhetjurnar: „Hey, strákar! Hann ætlar að taka mynd af okkur,“ sögðu hetjurnar og hamagangurinn var mikill þegar þeir hlupu í átt til ljósmyndarans.
Ljósmyndarinn: „Setjist þið hérna í grasið svo ég nái af ykkur mynd.“
Ofurhetjurnar: „Í hvaða blaði komum við?“
Ljósmyndarinn: „Í Víkurfréttum.“
Ofurhetjurnar: „Vá, við komum í Víkurfréttum,“ sögðu þeir og nokkur ofurhetjuöskur fylgdu í kjölfarið.
Ljósmyndarinn: „Hvað eruð þið eiginlega?“
Ofurhetjurnar: „Sérðu það ekki? Við erum Spider-man, Súperman og Pétur Pan,“ sögðu strákarnir og voru hneykslaðir á þekkingarleysi ljósmyndarans.
Ofurhetjurnar í Sandgerði kvöddu með skaðræðisópum og hlupu í burt, enda höfðu þeir lítinn sem engan tíma til að stilla sér upp fyrir myndatöku.

Myndirnar: Búnir að stilla sér upp. VF-ljósmynd/Jóhannes Kr. Kristjánsson.