Hestamannafélagið Máni opnar sögusýningu

Hestamannafélagið Máni opnar sögusýningu í samstarfi við Byggðasafn Reykjanesbæjar á morgun laugardag í tilefni hálfrar aldar afmælis félagsins. Sýningin verður í Bíósal Duus safnahúsa og opnar klukkan 14:00. Sýningin verður opin út árið.

Viðburðarríki sögu félagsins verða gerð skil í máli og myndum á sýningunni. Saga félagsins fjallar meðal annars um framkvæmdir, landgræðslu, æskulýðsstarf, ferðalög, þátttöku í mótum og umfram allt ræktun og umhyggju fyrir þeirri stórkostlegu skepnu sem íslenski hesturinn er, að því er kemur fram í tilkynningu frá félaginu. Frá stofnun árið 1965 hefur Hestamannafélagið Máni staðið fyrir fjölbreyttu félagsstarfi, til dæmis haldið hestaþing, fræðslu- og skemmtifundi, hestamót, kappreiðar, firmakeppni og staðið fyrir námskeiðum af margvíslegu tagi.