Heiðabúar setja svip á bæinn í Duus

Skátafélagið Heiðabúar fagnar 80 ára afmæli í september næstkomandi og af því tilefni verður sýningin „Þau settu svip á bæinn“ opnuð föstudaginn 9. júní kl.18 í Byggðasafni Reykjanesbæjar Duushúsum. Á sýningunni verða ýmsir munir til sýnis, farið verður yfir sögu skátafélagsins og stiklað á stóru.

Skátafélagið Heiðabúar var stofnað 15. september árið 1937 og aðalhvatamaður þess var Helgi S. Jónsson. Saga Heiðabúa er merkileg í skátasögunni vegna þess að í því félagi sameinast í fyrsta sinn í heiminum drengir og stúlkur í einu félagi. Heiðabúar hafa orðið þeirra gæfu aðnjótandi að þar hafa menn ekki gert aðeins stuttan stans heldur hafa þó nokkrir sinnt þörfum félagsins í mörg ár, sumir alla ævi.

Skátastarfið og skátaandinn vinna eftir þaulreyndum starfsaðferðum  og leitast við að skapa börnum og unglingum ánægjulega og þroskandi tómstundaiðju. Heiðabúar hafa ávallt sett svip á bæinn með virkri þátttöku í öllum helstu viðburðum bæjarins s.s. sumardaginn fyrsta, 17. júní, Ljósanótt, sumarstarfi fyrir börn og áramótum.

Sunnudaginn 11. júní frá kl. 14-16 munu Heiðabúar bjóða upp á skátasmiðjur þar sem hægt verður að læra tálgun, leðurgerð, hnúta og að skapa sinn eigin fána.

Sýningin í Duus stendur til 20. ágúst og er opin alla daga frá 12 til 17.