Heiðabúar bera af á Landsmóti skáta

Stór bær myndaðist í gær á opinberum heimsóknardegi Landsmóts skáta. Talið er að um 5.000 skátar og fjölskyldur þeirra hafi verið á mótinu sem haldið er á Úlfljótsvatni. Komu skátar hvaðan æva af í heimsókn á mótið og var öll umgerð mótsins til fyrirmyndar.

Heiðabúar, skátafélag Reykjanesbæjar, hafa staðið sig með eindæmum vel á mótinu. Félagið bar af öðrum íslenskum skátum þegar þeir gengu einir með íslenska fánann í fararbroddi inn á aðalvarðeld mótsins sem var í gær.

Ekki var þörf á að taka upp pollagallana á þessu móti þar sem veðrið var sérstaklega gott og um 28 stiga hiti var á svæðinu að sögn gesta í fjölskyldubúðunum. Fjöldi fólks var mættur í fjölskyldubúðirnar til að taka þátt í ævintýrinu með ungu kynslóðinni.