Hátíð í Vogum framundan: Verður sett heimsmet í vatnsbyssustríði?

Hinn árlegi  Fjölskyldudagur Sveitarfélagsins Voga verður haldinn laugardaginn  11. ágúst næstkomandi.  
Hátíð þessi hefur verið haldin undanfarin 10 ár og vaxið ár frá ári.

Markmið hátíðarinnar er að bæjarbúar skemmti sér saman. Fjölskyldudagurinn hefur reynst gott tækifæri til að hrista saman nýja sem gamla Vogamenn og Strandaringa og eiga saman góðan dag, segir á vef sveitarfélagsins en það er hægt að nálgast dagskrána í smáatriðum.
Fjölskyldudagurinn er einn dagur,  þar sem kappkostað er að það sé nóg um að vera fyrir alla aldurshópa, allan daginn og fram á kvöld.
Dagskráin er sniðin að fjölskyldunni, þar sem áhersla er lögð á samveru og samvinnu fjölskyldunnar.
Á dagskrá er meðal annars; dorgveiðikeppni, Vogaheimsmet í vatnsbyssustríði verður sett, kassabílarallý, risamylla, leiktæki, handverksmarkaður, ratleikur fjölskyldunnar,listasmiðja og  margt fleira skemmtilegt.

Listafólk og handverksfólk sem hefur áhuga á að koma að hátíðinni með sölu á munum/eða sýningu á verkum sínum, er bent á að hafa  samband  á [email protected] eða í síma 424 6882 virka daga milli  09-15.
Vakin er athygli á því að bæjarráð Sveitarfélagsins Voga hefur samþykkt að hundahald verði bannað á aðalsvæðinu í Aragerði á Fjölskyldudaginn.
Ennfremur er áréttað að Fjölskyldudagurinn er dagur fjölskyldunnar og á því að vera áfengis- og vímuefnalaus.

Mynd: Frá Fjölskyldudeginum í Vogum á síðasta ári. VF-mynd:elg