Hátíð í Suðurnesjabæ
Bæjarhátíð íbúa í Suðurnesjabæ, Vitardagar - hátíð milli vita, fór fram í síðustu viku. Hátíðin var sett með litagöngu síðasta mánudagskvöld við golfskálann að Kirkjubólsvelli.
Alla daga voru viðburðir í báðum byggðakjörnum og reyndar víðar, því hátíðar höldin náðu allt út á Stafnes þaðan sem hlaupið var í vitahlaupi að Garðskagavita. Einnig voru viðburðir á Hvalsnesi og á golfvellinum að Kirkjubóli, svo eitthvað sé nefnt.
Veðurguðirnir voru hliðhollir fólki flesta daga en þegar hátíðin náði hámarki á laugardag var talsverð væta og vindur. Við því var brugðist með því að flytja eitthvað af viðburðum inn í hús og annað í skjól.
Meðfylgjandi myndir voru teknar við hátíðarsviðið á laugardagskvöldinu.
Vitadagar í Suðurnesjabæ 2024 // Hátíðarsvæði á laugardagskvöldi
