Hanna og Gunna hættar á Garðaseli

Í dag kvöddu fyrrverandi og núverandi samstarfsmenn þeirra Jóhönnu Sigríðar Pálsdóttur og Guðrúnar Ástu Þórarinsdóttur þær með blómum og kaffihlaðborði á leikskólanum Garðseli. Þær Jóhanna og Guðrún hafa unnið í eldhúsi leikskólans nánast frá því hann var stofnaður, Guðrún í 28 ár og Jóhanna í 27 ár. Samstarfsmenn þeirra lofuðu þær mikið í dag og sögðu einsdæmi að hafa slíkann starfskraft sem þær stöllur, því þær komu aldrei of seint og urðu aldrei veikar, öll þessi ár.

Jóhanna segir að nú ætli þær að taka því rólega. „Ég var búin að ákveða fyrir löngu að þegar ég næði aldri þá myndi ég hætta og ég er að standa við það", sagði Jóhanna. „Ég er að hætta af því að hún er að hætta", sagði Guðrún þá að bragði. Þær segjast eiga eftir að sakna Garðasels, enda hafi það verið þeirra annað heimili og þær ömmur krakkana í leikskólanum. Að lokum vilja þær koma á framfæri þakklæti til allra sem þær hafa unnið með í gegnum árin og segja að þær hafi alltaf hlakkað til að koma í vinnuna á morgnanna og þessi ár á Garðaseli hafi verið góð ár.