HAMINGJURÁNIÐ Í FÉLAGSBÍÓ -VOX ARENA
Vox Arena, leikfélag Fjölbrautaskóla Suðurnesja, frumsýndi sl. fimmtudagskvöld í Félagsbíói franska söngleikinn Hamingjuránið eftir Bengt Ahlfors í leikstjórn Maríu Reyndal. Alls taka um 25 nemendur skólans þátt í uppfærslunni og hefur undirbúningur staðið yfir sl. tvo mánuði. Það er aðdáunarvert þegar ungt fólk í fullu námi tekur sér fyrir hendur slíkt þrekvirki sem uppsetning leikverks er en Vox Arena hefur alla tíð verið með virkustu félögum skólans og eins Ólafur Jón Arnbjörnsson skólameistari segir í leikskrá: “Sú ögun sem felst í þátttöku í leiklistarstarfsemi undir stjórn góðs leikstjóra er ekki síður nám og í raun reynsla sem nýtist mörgum nemandanum ekki síður og jafnvel betur til náms og starfa í framtíðinni”. Leikgleði nemendanna í Vox Arena var greinileg á þessari sýningu og metnaðurinn mikill. Því þótti undirritaðri miður að ekki skyldu fleiri njóta sýningarinnar og velti fyrir sér ástæðum þess að íbúar Reykjanesbæjar sjá sér ekki fært að styrkja menningu og listir í bæjarfélaginu. Nálægðin við höfuðborgarsvæðið skiptir þar víst nokkru máli en bæjarbúar verða að gera það upp við sig hvernig menningarlíf þeir kjósa í Reykjanesbæ. Hamingjuránið segir af Elísu Martinelli ítalskri blómarós og Gunnari Frey bankastarfsmanni af frónni sem fella hugi saman á listasafni í París. Skreytt með hvítri lygi, ást og list, ásamt páfagaukunum Tristan og Ísold er útkoman líkt og málverk eftir Chagal. Það reynir nokkuð á leikendur í þessari sýningu enda leikur höfundur sér að tengslum leikara við áhorfendann og þarf iðulega að áminna leikara um að tala nú réttum tungum, áhorfendur séu íslenskir og því dugi hvorki ítalska né enska. Verkið kitlaði hláturtaugarnar og ekki var söngurinn síðri. Þar var áberandi ung söngkona Guðrún Erla Hólmarsdóttir sem lék eitt aðalhlutverkið og eigum við vonandi eftir að heyra meira frá henni í framtíðinni. Aðrir leikendur voru Kristján Þór Kristjánsson, Guðmundur J. Árnason, Stefán Þ. Pétursson, Rakel Þorgeirsdóttir, Íris Jónsdóttir Thordersen, Petra M. Pétursdóttir, Þóra J. Benónýsdóttir, Ásta V. Bjarnadóttir, Jóhanna M. Pálsdóttir og Anna S. Elíasdóttir. Síðasta sýning Hamingjuránsins er í kvöld, fimmtudaginn 18. mars kl. 20.00 og vil ég hvetja þá sem enn hafa ekki séð sýninguna til þess að skemmta sér með ungu hæfileikafólki Fjölbrautaskóla Suðurnesja. Til hamingju með sýninguna, Dagný Gísladóttir.
