„Hálftíma gangur“ á Aftan Festival

Aftan Festival verður haldið á Mamma Mía í Sandgerði fimmtudagskvöldið 14. apríl og hefst kl. 21:00. Að venju er frítt inn á þessa stórskemmtilegu tónlistarveislu.

Tveir listamenn munu þreyta frumraun sína á Aftan Festivalinu á fimmtudag en þar ber fyrstan að nefna Alex úr hljómsveitinni Kimono. Alex, ásamt hljómsveit sinni, hefur m.a. gefið út diskinn Mineur-Agressif sem hefur notið nokkurra vinsælda. Kanadíski söngfuglinn Alex verður með strengjabrettið meðferðis og því von á góðu.

Finnbjörn og Fríða munu einnig koma fram saman í fyrsta skipti en Fríða er Aftan Festivalinu að góðu kunn og hefur komið þar nokkrum sinnum fram í dúettnum „Fríða og Dýrið.“ Finnbjörn stígur þó sín fyrstu spor á Aftan Festivali.

„Hálftíma gangur“ rekur svo smiðshöggið í Aftan Festivalið en hljómsveitin mun flytja frumsamin lög úr leikritinu Hans og Gréta sem verið er að sýna í Frumleikhúsinu um þessar mundir. Meðlimir hljómsveitarinnar þekkja Aftan Festival í bak og fyrir en þess má geta að piltarnir eru að taka upp tónlistina sem þeir spila í Hans og Grétu og verður hún gefin út á geislaplötu ásamt ævintýrinu sjálfu. Til gamans má geta að nafnið „Hálftíma gangur“ er sótt úr ævintýrinu um Hans og Grétu en það mun vera hálftíma gangur að sætabrauðshúsi nornarinnar.