Guðni á trukknum á DVD

Sunnudaginn 14. janúar 2018 var frumsýnd heimildamynd eftir Guðmund Magnússon kvikmyndagerðarmann. Myndin fjallar um lífshlaup Guðna Ingimundarsonar frá Garðstöðum í Garði og var mjög vel tekið. Núna er hugmyndin að gefa myndina út á DVD. Þetta kemur fram á Karolina Fund síðu þar sem stofnað hefur verið til söfnunar fyrir útgáfu myndarinnar á DVD.

„Guðni er fæddur árið 1923, gerði út trukk með lyftibúnaði og loftpressu og sá um fleygun og sprengdi jarðveg á suðurnesjum um hálfrar aldar skeið. Að því loknu hefur hann gert upp á annað hundrað véla af mörgum gerðum, gert þær gangfærar að nýju. Vélarnar eru til sýnis í Byggðasafninu í Garðinum. Þá kom Guðni með trukkinn að fjölda verkefna í höfnum á suðurnesjum, tengt framkvæmdum við hafnarmannvirki eða við lagfæringu og tilfærslu báta. Þá var hann kvaddur til aðstoðar við lausn á fjölbreyttum verkefnum tengt viðgerðum og flutningi á margs konar búnaði. Gjarnan fór hann um vegi á Suðurnesjum í óverðum til aðstoðar áður en björgunarsveitir náðu núverandi styrk.

Um árabil glímdi hann við að ná málmum í fjörum úr skipum sem þar urðu til og útbjó sig með búnað til þess. Fór með trukkinn á fjöru allt út í Flasarhaus á Garðskaga og var ætíð kominn með búnað sinn að landi áður en flæddi. Hreinsun málma úr fjörum má flokka með umhverfisvernd. Guðni var vitavörður á Garðskaga og Hólmsbergi í 25 ár, “ segir á söfnunarsíðunni.

Stefnt er að því að gefa myndina út á DVD diski eins og áður hefur komið fram en kostnaður við útgáfuna er um ein milljón króna með öllum réttindum. Þeir einstaklingar sem styrkja að upphæð 3000 kr. eða meira fá myndina á veglegum DVD diski. Hér er hægt að styrkja verkefnið.