Guðbergur Bergsson tilnefndur fyrir bók sína Tómas Jónsson-metsölubók
Rithöfundurinn Guðbergur Bergsson hefur fengið tilnefningu til bandarísku bókmenntaverðlaunanna Best Translated Book Awards fyrir bók sína Tómas Jónsson- metsölubók í flokki skáldsagna.
Afhending verðlaunanna verður fimmtudaginn 31. maí á kaupstefnunni New York Rights Fair. Í verðlaun eru fimm þúsund dollarar fyrir bæði höfunda og þýðendur og kemur fjárhæðin frá Amazon Literary Partnership sjóðnum.
Bókin Tómas Jónsson- metsölubók kom út í Bandaríkjunum sumarið 2017 en í fyrra voru fimmtíu ár liðin frá útgáfu bókarinnar og er hún talin hafa markað straumhvörf í bókmenntasögu landsins. Þá hefur hún oft verið nefnd fyrsta íslenska nútímaskáldsagan.
