Grindvíkingur semur óperettu um homma úr Grafarvoginum

Næstkomandi laugardag verður nýtt leikverk frumsýnt í Iðnó. Gestur –Síðasta máltíðin er nafn þess og höfundar þess eru Gautur G. Gunnlaugsson og Gunnar Kristmannsson sem er skólastjóri Tónlistarskólans í Grindavík. Víkurfréttir tóku Gunnar tali og spurðu hann út í verkefnið

Þið kallið verkið hinsegin óperettu. Hvað eigið þið við?
Þetta er óperetta sem fjallar um þrjá samkynhneigða menn. Óli og Laugi eru hommahjón sem búa í Grafarholtinu og eru ánægðir með líf sitt þar til gest ber að garði sem setur líf þeirra úr skorðum.

Af hverju óperetta um homma?
Við hlustuðum mikið á tónlist á þeim tíma sem við hófum að semja verkið og hápunktur óperunnar Don Giovanni eftir Mozart var okkur mjög hugleikinn. Þar syngja þrjár djúpar karlaraddir stórkostlega og dramatíska músík. Okkur þótti þetta svo flott að við hugsuðum að gaman væri að semja óperu fyrir þrjá barítóna, þá kom hugmyndin um að hafa persónurnar samkynhneigðar mjög fljótt upp enda er samkynhneigður ástarþríhyrningur sá skemmtilegasti sem hugsast getur því að allir geta orðið hrifnir af öllum.

Er þetta s.s. dramatískt verk?
Í bland já, en þó fyrst og fremst farsakenndur gamanleikur?

Hvernig hafa æfingar gengið?
Frábærlega. Leikstjóri er Þröstur Guðbjartsson og við hefðum ekki getað fengið betri mann. Við Gautur syngjum hlutverk hjónanna en Hrólfur Sæmundsson fer með hlutverk Gests, píanóleikari er hinn bráðflinki Spánverji Raúl Jiménez. Sem sagt valinn maður í hverju rúmi.