Golf á Suðurnesjum

Úrval golfvalla á Reykjanesi er mikið, fjórir talsins. 18 holu golfvöllur er í Leirunni, 13 holu völlur í Grindavík og í Sandgerði og á Vatnsleysuströnd eru 9 holu vellir. Skemmtilegir vellir bæði fyrir byrjendur jafnt sem lengra komna en golfíþróttin hefur notið aukinna vinsælda hér á landi undanfarin ár.

Hólmsvöllur í Leiru, sem er að margra mati fallegasti og skemmtilegasti golfvöllur landsins, er eini átján holu völlurinn á Reykjanesi. Strandvöllur í stórbrotinni náttúrunni þar sem iðandi fuglalíf hljómar í eyrum golfara. Á Hólmsvelli er fjöldinn allur af skemmtilegum holum og má þá helst nefna Bergvíkina, þriðja holan, þar sem margur kylfingurinn hefur þurft að sjá á eftir golfboltum til sjávarguðanna á einni erfiðustu holu landsins. Í Leirunni er glæsilegur golfskáli þar sem gott útsýni er yfir völlinn af svölunum. Veitingasala er í skálanum og einnig golfverslun þar sem hægt er að kaupa allt til golfiðkunar. Æfingasvæði er ekkert slor en skammt frá golfskálanum er yfirbyggt „driving range“ þar sem hægt er að æfa sveifluna og svo má ekki gleyma Jóelinum sem er níu holu völlur, sérstaklega ætlaður nýliðum.

Í Grindavík er Húsatóftavöllur, 13 holu golfvöllur rétt fyrir utan byggð, sem opnaður var 1981 og er næst elsti golfvöllur á Reykjanesi. Glæsilegur völlur sem liggur að nokkrum hluta meðfram sjávarlengjunni og er svo umlukin hrauni. Tvær nýjar holur hafa vakið töluverða athygli en það eru „martröðin“ (9. hola) og „skelfingin“ (10. hola) en þær bera nafn með réttu enda mjög erfiðar og ef ekki er spilað rétt geta menn lent í vandræðum. Á Húsatóftum er golfskáli með veitingasölu og æfingasvæði er einnig til staðar.

Vallarhúsavöllur í Sandgerði er þægilegur og góður golfvöllur sem hentar vel byrjendum jafnt sem lengra komnum og er léttur undir fótinn. Ekki er mikið um erfiðar holur á vellinum en 2. holan sem er par þrír hola er talin sú erfiðasta og hefur oft komið hátt skor af henni. Við Vallahúsavöll er gott klúbbhús með veitingasölu og einnig er þar ágætt æfingasvæði.

Golfvöllurinn á Vatnsleysuströnd er byggður upp frá gömlum túnum og er hann umlukin hrauni og grjótgörðum. Völlurinn er 9 holur, stuttur en samt sem áður nokkuð erfiður. Hann hentar vel fyrir byrjendur og háforgjafakylfinga. 5. hola vallarins hefur oft farið illa með margan kylfinginn enda þarf gott teighögg ef takast á að komast inná grín á þessari par þrjú holu. Klúbbhús er við völlinn þar sem er minniháttar veitingasala og ýmsar smávörur til golfiðkunar, s.s. boltar og tí.