Glimrandi jólahátíð í Sandgerði

Það var fullt út úr dyrum og mikið um dýrðir í Samkomuhúsinu í Sandgerðisbæ sl. sunnudag, þegar nemendur sem verið höfðu á námskeiði í Púlsinum í haust,sýndu listir sínar.Þetta er í annað sinn sem Púlsinn ævintýrahús heldur jólahátíð og hefur mikil fjölgun orðið á nemendum síðan á síðustu jólahátíð en þá tóku þátt um þrjátíu nemendur,nú voru þeir sextíu.

Þarna komu fram börn og unglingar frá þremur bæjarfélögum á Suðurnesjum;Garði, Reykjanesbæ og Sandgerði.Bæði börn og unglingar sýndu jólaleikrit,unglingsstúlkur voru með hiphop dans og söngnemendur frá 12 ára aldri sungu jólalög með undirleik.

Á leiksviðinu brá fyrir grýlu, leppalúða, jólasveinum og englum.Sumir leikhópanna höfðu sjálfir samið leikritin en þau voru öll með jólaívafi.Hátíðin tókst mjög vel og stolt nemendanna leyndi sér ekki þegar þeir skipuðu sér allir á leiksvið í lokin og sungu ásamt gestum í salnum Bráðum koma blessuð jólin.

Pizzuveisla var í lokin fyrir þátttakendur námskeiðanna.Þess má geta að að þegar búið var að greiða pizzusendlinum var afgangspeningur úr miðasölu.Eigendur Púlsins ásamt börnunum höfðu heitið afgangnum,ef einhver yrði,til hjálparstarfs nú um jólin. Ágóðinn rann óskiptur til Rauða kross Íslands.