Getum notað litina til að styrkja okkur

Flest erum við forvitin um okkur sjálf og hvað framtíðin mun bera í skauti sér og hvernig við getum notað nútíðina með styrk úr fortíðinni. Takmarkið er að læra að þekkja sjálfan sig svo að við getum gert líf okkar betra og innihaldsríkara. Reynir Katrínar hefur útbúið spil sem hann kallar Valva Yantra. Silja Dögg Gunnarsdóttir heimsótti Reyni sem lagði spilin fyrir hana og útskýrði um leið út á hvað lögnin gengi. En sjón er sögu ríkari.


Mynd: Reynir og spilin. Neðst á myndinni eru frumefnin, síðan goðin og í efstu röð eru örlaganornirnar.
„Spilin hafa verið í þróun í sjö ár. Yantra er grunnurinn að lögninni, en það er indverskt form sem er mikið notað í hugleiðslu til styrkingar. Síðan tengjast áruteikningar inn á spilin“, segir Reynir til útskýringar.
Í spilastokknum eru níu örlaganornir og átján goð, þ.e. Freyja, Baldur, Óðinn o.s.frv. Síðan eru fjögur tákna fyrir hverja tölu á bilinu 1-9. Í tölunum eru grunnefnin fjögur, þ.e. eldur, vatn, loft og jörð.
Reynir afhendir blaðamanni stokkinn með örlaganornunu níu. Þá er að stokka sjö sinnum og Reynir dregur síðan eina örlaganorn úr bunkanum sem er táknræn fyrir einstaklinginn. Síðan eru goðin stokkuð sjö sinnum, fjögur dregin út og þau lögð eftir kúnstarinnar reglum í kringum örlaganornina. Þá er tölustokkurinn stokkaður og fjögur spil dregin úr honum. Reynir les í yöntruna og teiknar að lokum mynd af yöntru blaðamanns. Fyrir neðan teiknar hann mynd af áru blaðamanns. Hann segir að litirnir í árunni, sem koma fram á teikningunni, notist til að styrkja og auðvelda viðkomandi að ná sínum markmiðum og skapa þar með betra jafnvægi hjá viðkomandi.
„Spilin byggja mikið á litum. Litirnir eru mjög mikilvægir því hver litur hefur ákveðin áhrif og er notaður til ákveðinna hluta. Litirnir tengjast einnig myndlistinni minni; þar horfi ég á þá. Þeir tengjast líka nuddinu, en þá skynja ég þá mjög sterkt. Það má því segja að þessar skynjanir blandist allar saman í spilunum“, segir Reynir og blaðamaður heldur sjálfsöruggur og glaður heim á leið eftir einstaklega fróðlegt stefnumót við Reyni grasalækni, förðunarfræðing, nuddara, mynlistarmann...
Þeir sem hafa áhuga á að kynna sér Valva Yantra betur geta haft samband við Reyni í síma 421-7142 eða í síma 861-2004.