Fyrirmyndardagurinn á Suðurnesjum gekk vel
Atvinnuleitendur með skerta starfsorku skoðuðu aðstæður á vinnustöðum.
Sautján atvinnuleitendur með skerta starfsgetu skoðuðu aðstæður á mörgum vinnustöðum á Suðurnesjum á fyrirmyndardeginum sem haldinn var sl. föstudag af Vinnumálastofnun. Markmiðið er að atvinnuleitendur með skerta starfsgetu fái aukin og fjölbreytt tækifæri á vinnumarkaði. Á þessum degi bjóða fyrirtæki og stofnanir þeim að vera gestastarfsmenn í fyrirtækjunum í einn dag eða hluta úr degi.
Í fyrra var Fyrirmyndardagurinn haldinn í fyrsta sinn á Íslandi og gekk dagurinn vonum framar. Að sögn Írisar Kristjánsdóttur hjá Vinnumálastofnun gekk átakið mjög vel. Þeir einstaklingar sem prófuðu sig áfram sem gestastarfsmenn í fyrirtækjum og stofnunum voru afar ánægðir með daginn. Störfin voru fjölbreytt í hinum ýmsu fyrirtækjum og stofnunum á Suðurnesjum.