Fyrirlestur um Gunnar Gunnarsson í Vogum

Lestrarfélagið Baldur í Vogum verður með erindi um Gunnar Gunnarsson, rithöfund, miðvikudaginn 8. febrúar kl. 20:00 í Álfagerði, Akurgerði 25, í Vogum. Allir velkomnir! Fyrirlesturinn er hluti af verkefninu Kynning á bókmenntaarfinum sem almenningsbókasöfnin á Suðurnesjum standa saman að. Verkefnið er styrkt af Menningarráði Suðurnesja.

Gunnar Gunnarsson var einn af áhrifamestu rithöfundum Íslendinga á tuttugustu öld. Hann sló í gegn sem höfundur í Danmörku og á árunum 1912-1939 var hann meðal virtustu höfunda Norðurlanda og naut mikillar hylli bæði gagnrýnenda og lesenda. Í fyrirlestrinum verður fjallað um rithöfundarferil Gunnars og tengsl hans við heimalöndin tvö, Ísland og Danmörku. Einnig verður vikið að einkalífi skáldsins sem var stundum stormasamt.