Fræddu forvitin ungmenni á forvarnadegi

Um 150 nemendur á fyrsta ári í Fjölbrautaskóla Suðurnesja tóku þátt í árlegum Forvarnardegi ungra ökumanna sem var haldinn í 88 húsinu í gær. Markmiðið með verkefninu er að vekja ungmennin til umhugsunar um þá ábyrgð sem fylgir því að fá bílpróf, fækka umferðaslysum og auka öryggi í umferðinni.

Ungmennin fengu fræðslu um afleiðingar umferðarlagabrota, sektir, tjónaskyldu og brot gegn 3ja aðila. Þau prufuðu ölvunargleraugu auk margra annarra verkefna sem þeim stóð til boða að leysa og tengjast umferðinni. Sviðsett var umferðarslys á planinu við 88 Húsið og nemendur fengu að sjá hvernig lögregla og sjúkraflutningamenn athafna sig þegar slys verður og klippa þarf bíl í sundur.

Eins og undanfarin ár voru grillaðar pylsur handa öllum þátttakendum.

Forvarnardagur ungra ökumanna er samstarfsverkefni Reykjanesbæjar, Lögreglunnar á Suðurnesjum, Brunavarna Suðurnesja, Fjölbrautaskóla Suðurnesja og Tryggingamiðstöðvarinnar.

Víkurfréttir voru á staðnum og tóku meðfylgjandi myndir.

Ölvunargleraugun prófuð.

Ungmennin fengu fræðslu um tryggingamál.

Allt að verða tilbúið fyrir pylsupartýið. Vantar bara pylsurnar. :)

Þessi ungi hnokki leit út fyrir að vera efnilegur verðandi ökumaður. 

VF/Olga Björt