Frábærir tónleikar KK í Garði

Söngvarinn KK hélt tónleika í samkomuhúsinu í Garði í gær, en þetta var einn fyrsti viðburðurinn á Sólseturshátíðinni.

KK var að vísu aðeins of seinn, því hann villltist á leiðinni, en um leið og hann hóf upp ráma raust sína gleymdu áhorfendur öllu slíku.

Meistarinn tók flest af sínum frægustu lögum, en hann sagði í uppphafi: „Ef þið haldið að ég ætli að koma hér upp og spila sömu lögin og ég hef gert síðustu 15 árin… þá er það alveg rétt hjá ykkur.“

Hann sveik ekki frekar en fyrri daginn þar sem Vegbúinn, Álfablokkin og fleiri sígild lög úr hans ranni glöddu eyru gesta, auk þess sem hann sagði sögur á milli laganna.

 

Oddný Harðardóttir, bæjarstjóri, setur hátíðina formlega kl. 12.30 en dagskrá má sjá með því að smella hér.

VF-myndir/Þorgils