Forvarnardagur í grunnskólunum

Forvarnardagur Forseta Íslands verður haldinn í grunnskólum landsins þann 6. nóvember næstkomandi.
Eitt af markmiðum þessa dags er að koma á framfæri við unglinga, fjölskyldur og samfélagið allt upplýsingum um þætti sem geta haft úrslitaáhrif á það hvort ungmenni verði vímuefnum að bráð.

Dagskrá sem er haldin innan skólanna þennan dag tekur mið af áratuga rannsóknum íslenskra háskóla sem hefur sýnt fram á að þrjú heillaráð geti stuðlað að því að forða börnum og unglingum frá því að ánetjast vímuefnum.

Þau eru:
Að fjölskyldan verji sem mestum tíma saman.
Að hvetja börn og unglinga til þátttöku í skipulögðu íþrótta- og æskulýðsstarfi.
Að því lengur sem unglingar sniðganga áfengi þeim mun ólíklegra er að þeir ánetjist vímuefnum. Hvert ár skiptir máli.