Forsala aðgöngumiða á Óskalög sjómanna í Grindavík í kvöld

Þann 31.maí, fimmtudaginn fyrir sjómannadaginn, verður dagskráin Óskalög sjómanna -skemmtun og fjöldasöngur haldin í þriðja sinn og að þessu sinni  í Félagsheimilinu Festi.  Forsala aðgöngumiða verður í Festi í kvöld, þriðjudaginn 29. maí kl. 20 – 21.

Vegna fjölda áskoranna verður fjörið í félagsheimilinu Festi enda komast fleiri gestir að. Því er hægt að sitja við borð og hafa það huggulegt og þá geta fótafimir gestir jafnvel tekið sveiflu á dansgólfinu. Léttar veitingar verða til sölu í Festi. Það stefnir því í rífandi vertíðarstemmningu á fimmtudaginn.

Syngjum okkur inn í hina frábæru Sjómannadagshelgi í Grindavík með Óskalögum sjómanna. Þar sem söngur hljómar sestu glaður, það syngur enginn vondur maður!

Flutt verða gömul og sígild sjómannalög eins og Síldarvalsinn, Allt á floti alls staðar, Á sjó, Þórður sjóari, Ship ohoj, Síðasta sjóferðin að ógleymdum Simba sjómanni ásamt mörgum öðrum perlum. Þá verður glænýtt sjómannalag  flutt en það er eftir gítarleikara Meðbyrs, Þröst Harðarson. Þá mun Gylfi Ægisson tónlistarmaður heiðra okkur með nærveru sinni og flytja vinsælustu lögin sín eins og Stolt siglir fleyið mitt, Gústa guðsmann, Minning um mann o.fl.

Flytjendur Óskalaga sjómanna  eru: Rósa Signý Baldursdóttir, Dagbjartur Willardsson, Inga Björk Runólfsdóttir, Inga Þórðardóttir, Björn Erlingsson, Einar Friðgeir Björnsson, Halldór Lárusson og Þröstur Harðarson, en hljómsveitina kalla þau Meðbyr.


Mynd: Hljómsveitin Meðbyr 2007.