Fjörheimar og Þruman komust áfram í söngkeppni Samfés

Söngkeppni Samfés í Suðurlands og Suðurnesjariðli var haldin með pompi og prakt í Vogum um síðustu helgi. Helgin gekk frábærlega vel og voru um 400 unglingar sem tóku þátt í fjörinu.

Unglingarnir gistu í grunnskólanum í Vogunum. Á föstudagskvöldinu var  sundlaugarpartý ásamt því að félagsmiðstöðin var opin fyrir þau sem  vildu skella sér í billiard, Guitar-hero og fl. Á laugardeginum var ýmis afþreying í boði fyrir unglingana t.d. listasmiðja, förðunarsmiðja, pílusmiðja og margt fleira. En á meðan voru keppendur kvöldsins í hljóðprufum fyrir kvöldið mikla.

Fimmtán félagsmiðstöðvar tóku þátt og var það erfitt val fyrir dómnefndina að velja úr þá fimm keppendur sem þóttu skara framúr og fengju sæti í lokakeppninni.

Bólið í Mosfellsbæ hreppti fyrsta sætið eftir harða keppni, en fjórar aðrar félagsmiðstöðvar komust einnig áfram í aðalkeppnina, það voru Féló Vestmannaeyjum, Þruman í Grindavík, Fjörheimar í Reykjanesbæ og Zelsíuz á Selfossi. Munu þær taka þátt í aðalkeppni Samfés sem haldin verður í mars á næsta ári.

Eftir keppnina héldu þeir Dj Óli Geir og Andra Ramirez uppi stuðinu og náðu þeir að sögn upp gríðalegri stemmningu svo að þakið ætlaði af húsinu á tímabili

Unglingarnir voru annars til fyrirmyndar alla helgina og skemmtu sér konunglega. Fjölmargar myndir má finna á heimasíðu Fjörheima. Smellið hér.

Mynd: Þórdís Birna Borgarsdóttir, fulltrúi Fjörheima, komst áfram með flutningi sínum á laginu Forever Young.