Fjör í Reykjaneshöllinni

Það var mikið fjör hjá krökkunum sem voru að leika sér í nýjum hoppukastala sem Reykjanesbær hefur fest kaup á fyrir Tómstundaskóla Reykjanesbæjar, en skólinn hófst formlega í öllum grunnskólum mánudaginn 15. september. Rúmlega hundrað nemendur hafa skráð sig, en Frístundaskólinn er nýjung í starfi Reykjanesbæjar. Boðið er upp á samfellda dagskrá fyrir börn í 1. til 4. bekk þar sem fléttað verður saman íþróttaæfingu, listum, tómstundastarfi og fræðsluverkefnum ásamt næringu, heimanámi og hvíld. Á föstudögum verður boðið upp á svokallaðan leikjadag, en þar geta krakkarnir leikið sér og eins og meðfylgjandi mynd ber með sér finnst krökkunum þetta mjög gaman. Stefán Bjarkarson forstöðumaður Menningar-, íþrótta- og tómstundasviðs sagði að á föstudögum í vetur, á leikjadegi Frístundaskólans sé ætlunin að kenna krökkunum allskyns gamla leiki, s.s. fallna spýtu, stórfiskaleik og fleira.