Fjölskylduhátíð í Sandgerði í dag

Það verður eflaust mikill hátíðarbragur í Sandgerði í dag þar sem Sandgerðisdagar standa yfir með þéttskipaðri dagskrá fyrir alla fjölskylduna. Í dag verður m.a. hverfakeppni í litbolta, markaðstjald, ýmsar uppákomur í Púlsinum, listasýningar, dorgveiðkeppni, Sandgerðistuddinn, Bjarni töframaðu kemur fram ásamt Lísa í Idol, Björgvini Franz og Dofra dverg svo nokkuð sé nefnt. Þá mun hin landskunna hljómsveit Skítamórall mæta á svið.

Götu- og hverfagrill eru fastur liður í hátíðinni fyrir kvöldskemmtunina og lýkur með hverfagöngu að hátíðarsviðinu. Um kvöldið skemmta Gunni og Felix, kveikt verður í varðeldi og harmonikkufélagið leikur fyrir gesti. Hápunktur kvöldsins verður þegar Hobbitarnir úr Sandgerði spila fyrir bryggjuballi þar til dagskrá lýkur á hátíðarsviði með sprengjum og eldingum að hætti björgunarsveitarinnar Sigurvonar úr Sandgerði. Eftir dagskrá á hátíðarsviði tekur við skemmtun á skemmtistöðum bæjarins, Mamma mía og Vitanum auk þess sem Skítamórall leikur fyrir dansi í Samkomuhúsinu.

Á morgun er hægt að fara í hvala- og höfrungaskoðun með Eldingunni, opið hús verður í Miðhúsum og nýr og betri Grunnskóli verður opinn fyrir gesti og gangandi.