Ferskir ofurvindar léku um listahátíð í Garði

Opnun listahátíðarinnar Ferskir vindar í Garði var síðdegis í gær. Sannkallaðir ofurvindar léku um opnunarhátíðina sem fór fram í húsnæði við bæjarskrifstournar í Garði. Utandyra voru 20 metrar á sekúndu og brunagaddur. Sýningar opna í dag, föstudaginn 7. janúar, kl. 13. Mikil dagskrá verður um helgina þar sem listamenn sýna verkin sem þeir eru búnir að vinna að síðustu vikur.

Verkefnið hefur verið á fullum krafti og mikið um að vera en listamennirnir hafa unnið mikið í áhaldahúsinu og samkomuhúsinu, sem í dag er kallað Casablanca, en einnig víða um bæinn á meðan skólarnir voru ekki starfandi.

Á laugardaginn hefst dagskráin kl. 13 með sýningu á Sunnubraut 4 en þaðan verður einnig farið með rútu eftir Garðbraut og Skagabraut til að skoða skúlptúra. Gjörningar, tónlist og sýningar verða svo hér og þar um bæinn langt fram á kvöld. Á sunnudeginum munu Atli Ingólfsson, Hilmar Örn Hilmarsson, Páll á Húsafelli og Áki Ásgeirsson standa fyrir tónleikum í Miðgarði en dagskráin endar svo kl. 19:30 á sunnudagskvöldinu með gjörningi Norbert Mauk í samkomuhúsinu.

Þeir sem vilja nálgast dagskrá og götukort geta sótt meðfylgjandi skjal hér.

Forsetafrúin, Dorrit Mussaief, er verndari Ferskra vinda í Garði.

Thor Vilhjálmsson skáld flutti kvæðabálk fyrir opnunargesti í gær. Thor tekur virkan þátt í Ferskum vindum og segir sögu Garðsins vera mikla og merkilega.