Fallegir garðar í Sandgerði verðlaunaðir

Í síðustu vikur voru veittar viðurkenningar fyrir fallega garða í Sandgerði. Viðurkenningar sem þessar hafa verið veittar í 20 ár en 50 garðar og hús hafa hlotið viðurkenningu. Sjá myndir af verðlaunagörðunum hér að neðan.
Umhverfis-, ferða- og menningarmálaráð Sandgerðir ákvað að veita eigendu fjögurra hús viðurkenningu fyrir snyrtilegt umhverfi. Eigendur Suðurgötu 8, Margrét Böðvarsdóttir hlaut viðurkenningu fyrir endurbætur á lóð, eigendur Ásabrautar 12, Helga Karlsdóttir og Jón Ásmundsson fengu viðurkenningu fyrir snyrtilegt umhverfi húss og lóðar. Þá voru eigendum Stafnesvegar 1 veitt viðurkenning fyrir endurbætur á húsi og lóð en eigendur hússins sem er tvíbýli eru systurnar Auðbjörg Laufey og Lilja Guðjónsdætur og eiginmaður Lilju, Þórir Björn Hrafnkelsson. Titilinn Verðlaunagarður 2001 kom í hlut eigenda Stafnesvegar 4, Valgerðar Bergsdóttur og Elís Björns Klemenssonar. Ingþór Karlsson, formaður unhverfis-, ferða- og menningarmálaráðs Sandgerðis afhenti viðurkenningarnar á Vitanum þar sem boðið var upp á kaffi og smurbrauð. Með viðurkenningum sem þessum vonast nefndin til að þær séu ekki einungis viðurkenning til þeirra sem þær hljóta fyrir aðdáunarleg og vel unnin störf heldur einnig hvatning og góð fyrirmynd til annarra íbúa í Sandgerði og nágrenni til að ganga vel og snyrtilega um umhverfi sitt, hús og lóðir.