Fagna fjölbreytileikanum á fjölskylduhátíð

Nú eftir áramót buðu samtökin Móðurmál upp á tungumálakennslu fyrir tvítyngd börn á Suðurnesjum. Slíkt hafði ekki verið áður í boði og því margir sem sóttu kennslu um helgar til höfuðborgarsvæðisins. Að sögn Kriselle Lou gekk vorönnin á Suðurnesjum vel. „Fræðsluskrifstofa Reykjanesbæjar var tilbúin að aðstoða okkur og við fengum að hafa kennsluna í Myllubakkaskóla og var samstarfið við skólann mjög gott,“ segir hún.

Boðið var upp á kennslu í pólsku, litháísku, filippseysku, arabísku og ensku og voru nemendur 35 talsins. Kennararnir sinntu allir starfi sínu í sjálfboðavinnu. „Sjálfboðakennararnir fóru á námskeið um móðurmálskennslu og fjöltyngda nemendur á vegum samtakanna Móðurmál og aftur verður boðið upp á námskeið í haust. Kriselle segir þau stefna ótrauð á að halda kennslunni áfram næsta skólaár. „Okkur vantar þó fleiri sjálfboðakennara því við viljum bæta fleiri tungumálum við.“

Næsta laugardag, þann 30. apríl, halda Samtökin Móðurmál fjölskylduhátíð í sal Myllubakkaskóla á milli klukkan 11 og 13. Á hátíðinni verða tungumálahóparnir með bása og sýna kennsluefni og bækur. Boðið verður upp á ýmsa smárétti frá mismunandi löndum og leiki fyrir börnin. „Hátíðin er frábært tækifæri til að fagna fjölbreytileikanum og það eru allir hjartanlega velkomnir,“ segir Kriselle.