Fagaðilar en ekki moðhausar sem ráða för

Tómas J. Knútsson, framkvæmdastjóri Bláa hersins, hlýðir Víði og var að mestu innan lóðarmarka heimilisins um páskana.

– Hvernig páskaegg fékkstu og hver var málshátturinn?

Ég fékk egg númer 4 frá Nóa með Trompi. Át það „óvart“ á skírdag en átti annað lítið sem vara. Þar stóð: „Handaverkin lifa hvers lengst.

– Hvaða aðferðir ertu að nýta til að eiga í samskiptum við fólk?

Ég hringi mikið en var að fá mér vefmyndavél fyrir tölvuna og get þá notað Zoom og Skype fyrir fundi og fleira.

– Ef þú fengir bara að hringja eitt símtal í dag, hver fengi það símtal og hvers vegna?

Dætur mínar og fjölskyldur þeirra sem ég elska meir en allt.

– Hvernig ertu að upplifa nýjustu tíðindi um að það muni jafnvel margar vikur inn í sumarið að aflétta hömlum vegna COVID-19?

Ég er ofsalega sáttur með þau viðbrögð og það teymi sem stjórnar hér á Íslandi. Við megum prísa okkur sæl að hér eru það fagaðilar en ekki moðhausar sem ráða för.

– Hvaða lærdóm getum við dregið af heimsfaraldrinum?

Mannkynið þurfti að núllstilla og það er það sem verið er að gera hér. Þegar þessu yfirlýkur ætla ég rétt að vona að fólk átti sig á því hvað á að vera í forgang, það eru umhverfismál og virðing fyrir kærleika og ást.

– Ertu liðtækur í eldhúsinu?

Það er ekki oft kvartað yfir matseldinni minni sem betur fer.

– Hvað finnst þér virkilega gott að borða?

Hægeldaður matur, læri, kalkúnn, hryggur, hamborgarhryggur með öllu tilbehör á danska vísu.

– Hvað var í páskamatinn?

Hægeldaður kalkúnn með öllu, hann var geggjaður og fyllingin, maður lifandi.

– Hvað finnst þér skemmtilegast að elda?

Grilla hamborgara á sumrin og grilla humar með hvítlaukssmjöri.

– Hvað var bakað síðast á þínu heimili?

Smákökur um jólin. Frúin sá um það.

– Ef þú fengir 2000 krónur. Hvað myndir þú kaupa í matinn?

Góðan plokkfisk og þrumara með.