Fær innblástur frá æskuslóðunum

 

Rúnar Þór sýnir aðallega myndir af bátum og frá landslagi í Grindavík sem hann málar bæði á striga og krossviðarplötur. „Mér var hent út af vinnumarkaðinum og byrjaði að fikta við þetta fyrir fimm árum eða svo. Í tvö ár var ég hjá Hlutverkasetrinu og þar var myndlistakona sem var að kenna og sótti ég tíma hjá henni í tvö ár. Við vorum fjögur sem stofnuðum svo saman myndlistarklúbb, leigðum okkur sal og þar höfum við málað frá tíu til þrjú einhverja daga í viku. Klúbburinn er enn starfandi,“ segir Rúnar Þór. Römm er sú  taug og um leið og hann tók pensilinn í hönd leitaði hugurinn á heimaslóðir í Grindavík með viðfangsefni. „Ég er uppalinn í Grindavík, stundaði sjóinn og var í slorinu. Um leið og ég fór að mála komu æskuslóðirnar fram. Ég á fullt af skyldfólki í Grindavík og því verður gaman að koma þangað og halda sína fyrstu einkasýningu,“ sagði Rúnar Þór.