Enska hljómsveitin I'm Being Good í Keflavík í kvöld

Hljómsveitin I'm Being Good hefur verið á tónleikaferð um landið og spiluðu meðal annars á Aldrei fór ég suður á Ísafirði um páskahelgina. Þeir enda tónleikaferð sína í Keflavík, nánar tiltekið í Frumleikhúsinu í kvöld kl. 20:00. Aðgangseyrir er kr. 600 og ekkert aldurstakmark. Ásamt þeim koma fram ÆLA, SKÁTAR og KOJA.

I'm Being Good er kvartett frá strandborginni Brighton og hefur starfað í ýmsum myndum frá árinu 1992. Sveitin hefur gefið út þrjár plötur og hefur skipað sér í hóp með framsæknustu jaðarsveitum Breta. Á meðal aðdáenda sveitarinnar var útvarpsmaðurinn John heitinn Peel sem bauð þeim nokkrum sinnum í hinar annáluðu Peel Sessions.