Ekkert blóð í sætum Sambíóanna

Sambíóin tóku nýlega upp á því að bjóða viðskiptavinum sínum upp á ókeypis dömubindi á salernum í öllum þeirra kvikmyndahúsum.

,,Mér finnst þetta magnað framtak. Dömubindi er nauðsynjavara fyrir helminginn af bíógestum okkar. Náttúran gerir ekki alltaf boð á undan sér og ég er stoltur af því að geta verið til þjónustu reiðubúinn ef þurfa skyldi", segir Ólafur Ingvi Hansson, sýningarstjóri Sambíóanna í Keflavík í samtali við Víkurfréttir.

,,Þetta hefur verið baráttumál lengi um allan heim og mér finnst löngu tímabært að gera þetta að norminu. Ég hef fulla trú á því að það verði orðið sjálfsagður hlutur að útdeila þessu á flest öllum almenningsalernum og það er spennandi að vera með fyrstu fyrirtækjunum til að bjóða upp á þessa þjónustu á landsvísu."

Mikið hefur verið rætt um þetta mál á samfélagsmiðlum og einhverjir velt því fyrir sér hvað karlar fái þá ókeypis í staðinn. Þar hafa einhverjir stungið upp á ókeypis smokkum en Ólafur Ingvi segist ekki skilja þá tengingu.

,,Það að bjóða upp á smokka á salernum bíóhúsa er algjörlega út í hött. Vissulega er hægt að skoða umræðuna um að gera getnaðarvarnir aðgengilegri en ég sé ekki hvernig not fyrir getnaðarvarnir ætti að koma upp í bíósal."

Fólk virðist þó almennt taka þessu uppátæki fagnandi og umræðan verið að mestu leyti jákvæð.

,,Það er alltaf einhver minnihluti sem þarf að gagnrýna svona hluti. En flest allir í þeim hópi hafa einmitt aldrei þurft að nota dömubindi og munu aldrei þurfa."