Davíð leikur Húbert og herforingja í Hárinu

Davíð Guðbrandsson, leikari frá Keflavík, er kominn með hlutverk í Hárinu sem sýnt verður í sumar. Hann er hér í léttu spjalli við Víkurfréttir.

Hvaða hlutverk ertu að leika í Hárinu?
Ég er að leika nokkur minni hlutverk, ég er túristinn Húbert og herforingi í stríðinu. Svo er ég hluti af hippahópnum sem dansar og syngur allt verkið út í gegn og enginn tími til að hangsa baksviðs og drekka kaffi og tala um pólitík. Það er skemmtilega krefjandi að dansa og syngja svona mikið, það er eitthvað sem ég er óvanur, þannig að það er mikið um hæsi og harðsperrur þessa dagana.
Varstu búinn að sjá verkið áður á sviði eða á myndbandi?
Ég er hvorki búinn að sjá söngleikinn né myndina, en myndin verður leigð að sýningum loknum. Þessi saga er algerlega ný fyrir mér.
Hvernig er hópurinn sem kemur að uppsetningunni?
Þetta er mjög kraftmikill hópur sem kemur að sýningunni, góð blanda af listamönnum. Þarna er öll flóran, leikarar, söngvarar, dansarar og tónlistarmenn og skemmtilegur andi sem myndast þegar við komum saman. Allir að læra eitthvað nýtt, eiginlega allir að læra af öllum.
Hvað hefur þú verið að gera síðan þú útskrifaðist?
Svona eitt og annað. Það var svolítið undarlegt að útskrifast úr skólanum og verða sinn eigin herra eftir að hafa verið í námi frá því að maður var pínulítill og hálftannlaus. En þetta er allt að koma. Undanfarið hef ég verið að vinna mikið við upplestur og auglýsingar, auk útvarpsleikhússins. Og núna er allt vitlaust að gera í Hárinu.
Er eitthvað annað á sjóndeildarhringnum hjá þér?
Ég er hluti af litlum sjálfstæðum strákaleikhóp. Við köllum okkur Tengdasyni og fengum styrk frá Hinu húsinu til þess að sýna þrjú ný íslensk leikverk á sex vikum, og það er allt að fara af stað. Auk þess fékk ég hlutverk í bíómynd sem tekin verður síðsumars. Hún heitir Strákarnir okkar og fjallar um samkynhneigt fótboltalið. Leikstjóri hennar er Róbert Douglas, sá hinn sami og gerði Íslenska drauminn og Maður eins og ég.
Það eru sem sagt mörg skemmtileg verkefni framundan og lítill tími fyrir sólböð í sumar.