Clintonhjónin og bandarískir þingmenn í Bláa lónið

Hillary og Bill Clinton koma hingað til lands í heimsókn í næstu viku og eiga fundi með Íslendingum. Þau eru á ferð með sendinefnd bandarískra þungavigtarþingmanna.  Stöð 2 greindi frá því í gærkvöldi að þingmannanefnd undir forystu Johns McCains kemur hingað til lands á þriðjudaginn kemur.

Margir mánuðir eru síðan heimsókn nefndarinnar var ákveðin, segir á Vísi.is og hefur gríðarleg leynd legið yfir málinu. Nefndin hefur verið á ferðalagi að kynna sér umhverfisvænar orkulindir og mun því ætla að eiga stuttan stans í Bláa lóninu á leið sinni vestur um haf, bæði til að kynna sér raforkuverið og slaka á. Eftir sundsprett bíður utanríkisráðherra nefndinni í hádegisverð, auk þess sem Jón Björn Skúlason, framkvæmdastjóri Nýorku, mun ræða vetnisorku við nefndarmenn.

Það eru þekkt nöfn úr bandarískum stjórnmálum sem koma hingað, þeirra á meðal Joe Lieberman og svo Hillary Clinton, sem ætlar að eiga lengri dvöl hérlendis en aðrir nefndarmenn sem stoppa aðeins í nokkrar klukkustundir. Hillary verður raunar aðeins til kvölds hér á landi ásamt eiginmanni sínum og fyrrverandi forseta Bandaríkjanna.

Bill Clinton, sem hefur áður sagt frá því að hann eigi góðar minningar úr flugferðum með Loftleiðum sálugu á námsárum sínum í Oxford. Hvernig dagskrá þeirra hjóna lítur út er mikið leyndarmál en samkvæmt heimildum fréttastofu Stöðvar 2 hafa þau þó hug á að hitta einhverja Íslendinga og hefur dagskrá verið skipulögð fyrir þau bæði.

Allnokkur taugatitringur er meðal þeirra sem málið snertir og fréttastofa Stöðvar 2 ræddi við í dag, einkum vegna öryggismála. Fréttastofan hefur þó heimildir fyrir því að þeir sem bera ábyrgð á þeim þætti hafi engar áhyggjur.

Vísir.is greinir frá þessu.