Bítlar Bjössa Thors á Bryggjunni

Gítarleikarinn Björn Thoroddsen hefur árum saman unnið með lagasmíðar Bítlanna enda ætlaði hann að eigin sögn að ganga í hljómsveitina á yngri árum. Úr því varð ekki. Bítlarnir vissu ekki af honum og hættu, reyndar áður en Bjössi lærði almennilega á gítar. 

Bítlalögin hafa gegnum árin verið á efnisskrá Björns, oft í mögnuðum útsetningum. Hann hefur brotið lögin niður í frumeindir og byggt þau upp að nýju. Á nýrri plötu sinni spilar hann lögin einn og óstuddur þótt stundum hljómi þau eins og í flutningi hefðbundinnar Bítlahljómsveitar með tveimur gíturum, bassa og trommum.

Túlkun Björns á Bítlalögunum hefur vakið mikla athygli á tónleikum hans víða um lönd að undanförnu. Nú geta íslenskir aðdáendur Bjössa og Bítlanna notið þeirra á tónleikum á Bryggjunni, Grindavík, laugardaginn 16. nóvember kl. 21.00.