Barnahátíð sett í Reykjanesbæ

Barnahátíð í Reykjanesbæ var formlega sett í morgun með opnun veglegrar listsýningar barna sem standa mun yfir í Listasafni Reykjanesbæjar í rúma viku. Sýningin er liður í Listahátíð barna sem nú er haldin í fimmta sinn og er hluti af Barnahátíðinni.

Listahátíð barna er samvinnuverkefni Listasafns Reykjanesbæjar og allra 10 leikskóla Reykjanesbæjar. Hátíðin hefur vaxið og eflst með hverju ári og segja má að hún hafi orðið kveikjan að þeirri stóru barnahátíð sem nú verður haldin í Reykjanesbæ þar sem virðing fyrir börnum og störfum þeirra og þörfum er höfð að leiðarljósi.

Yfirskrift listahátíðar barna árið 2010 er Hafið og á öllum leikskólum hafa börnin fræðst um hafið og með margvíslegum hætti. Alls kyns listaverk hafa litið dagsins ljós, æfðir hafa verið nýir söngvar um fiska og haf, sjávardýr hafa verið krufin og svona mætti lengi telja. að sá viðburður verður einnig upphafsatriði Barnahátíðar í Reykjanesbæ.

Í listasal Duushúsa hafa börnin skapað neðansjávarheim með öllum þeim undrum sem þar finnast. Listasmiðja verður starfrækt í Bíósal sem stendur öllum bæjarbúum opin og þar verða einnig myndlistarverk frá öllum leikskólunum. Dagana 23. - 30. apríl koma leikskólarnir í heimsókn og standa fyrir stuttri skemmtidagskrá sem er öllum opin.
Sérstakur viðburður tengdur hátíðinni verður heimsókn Svabba sjóara sem fræðir börnin um íslensk vatnaskrímsli í Bíósal, laugardaginn 24. apríl kl. 14.00 og 15.00

Sýningin stendur frá 21. apríl til 2. maí og listasmiðjan verður starfrækt allan tímann. Opið virka daga frá kl. 11.00 - 17.00 og um helgar frá kl. 13.00 - 17.00. Ókeypis aðgangur.
----
Efsta mynd: Árni Sigfússon, bæjarstjóri, sleppti bréfdúfum við setningu hátíðarinnar en dúfurnar eiga að flytja skilaboð til annarra barna og láta þau vita um Barnahátíðina í Reykjanesbæ.