Áttugasta jólablað Faxa komið út
Óslitin útgáfa í 80 ár.
Tímaritið Faxi, sem málfundafélagið Faxi gefur, út fagnar 80 ára afmæli í dag, mánudaginn 21. desember. Tímaritið á óslitna útgáfusögu og hafa útgefendur frá upphafi verð fylgt stefnu sem sett var fram á fyrstu forsíðu blaðsins um að leggja áherslu á menningar- og framfaramál á Suðurnesjum.
Málfundafélagið Faxi var stofnað af valinkunnum Keflvíkingum 10. október 1939 aðeins tæpum mánuði eftir byrjun seinni heimstyrjaldarinnar. Þegar á fyrsta starfsári vaknaði áhugi Faxafélaga á því að efna til blaðaútgáfu til að skapa vettvang fyrir skrif og umræður um framfara- og menningarlíf á Suðurnesjum.
Valtýr Guðjónsson, ritstjóri blaðsins, rammaði inn erindi tímaritsins Faxa í eftirfarandi skrifum í fyrsta tölublaðinu sem kom út þann 21. desember 1940. ,,Það sem vakir fyrir Málfundafélaginu Faxa í Keflavík er það ræðst í þessa útgáfu er meðal annars þetta: „Sú þögn sem ríkir um menningar- og framfaramál þessa héraðs bæði utan þess og innan er óréttmæt og óholl. Héraðsbúum sjálfum þarf að gefast kostur á að fylgjast með því hvað er að gerast í þeirra fjölmenna og athafnasama héraði. Þeir þurfa að skilja og meta það sem þegar hefur áunnist fyrir átök margra og merkra manna. Þeir þurfa að koma auga á hina margháttuðu möguleika til stærri átaka í framtíð á sviðum menningar og framfara.“
Leitast hefur verið að fylgja þessum leiðarljósum og stuðningur einstaklinga, fyrirtækja og sveitarfélaga á Suðurnesjum hefur gert Faxafélögum kleift að segja og skrá sögu Suðurnesjamanna samfleytt í 80 ár í tímaritinu Faxa sem fagnar 80 ára útgáfuafmæli í dag, 21. desember.
Þau 541 tölublöð sem gefin hafa verið út af Faxa eru ein haldbærasta sögulega heimildin um Suðurnesin síðustu 80 árin og má finna þau á stafrænu formi á timarit.is. Þannig hefur Suðurnesjamönnum, og þeim sem vilja fræðast um Suðurnesin, verið tryggt aðgengi að þessum heimildum.
